17.8.11
ప్రజల్లో వచ్చిన కదలిక
ప్రజ్వలించటం ఓ హక్కు
అన్యాయం ఏదైనా
నిలవేయడం ఓ చరిత్ర
పర్వతాల పై నుండి
కిందకు బొట్టు జారడం లేదు
దోసిలి బట్టినోడు
ఆకాశంవేపు చూడడమే తప్ప
దప్పిక తీరడం లేదు
జేబుల్లో కుక్కుకునేవారు కొందరు
డొక్కల్ని ఎండ బెట్టుకునేవారు కొందరు
దిక్కులన్ని పిక్కటిల్లేలా
అరుస్తున్న అరుపులు
ఆఫీసుల్లో వున్న అధికారులకు
వినిపించని ఉరుములు
జీవన సంక్షోభమంతా
యిచ్చేవాడికి తీసుకునే వాడికి
మధ్యనున్న చేతులే సృష్టిస్తున్నాయి
యిచ్చేవాడే మింగేస్తే
ఇంకా పాలనేముంది?
పాలకులేమున్నారు?
ఉద్యమమేదైనా
కొవ్వొత్తిలానే వెలుగుతుంది
సూర్యగోళం అంత కావడానికి
ఎంతోకాలం పట్టదు.
No comments:
Post a Comment