పెదాల పై పలకరింపులు
రాలిపోతున్న పూల వంటివి
హృదయం నుండి మాట్లాడడం
బాగా తగ్గిపోతున్న కాలమిది
మానవ సంబంధాలు
ఆర్ధిక సంబంధాలుగా మారుతున్నాయి
ఆ శిశువు నవ్వులోనే
సుగంధ పరిమళాలు
నిజమే!
ఆ పాప ఎక్కువ సేపే నిద్రిస్తుంది
ఈ కృత్రిమ సమాజంలోకి ప్రవేశించడానికి
తన మెదడుని సిద్ధం చేసుకోవడానికే నిద్రిస్తుంది
సూర్యోదయానికి ముందు
వీస్తున్న చల్లని గాలి కోసమే
ఆ పాప ఎదురు చూపు
మానవులారా!
మీరు నిజంగా నిద్ర పొండి
మేల్కోవడానికి అప్పుడే
అర్ధం తెలుస్తుంది.
No comments:
Post a Comment